新鮮雞湯碗仔翅

Daphne 樂思廚 — Sat, 31 Jul 2021 13:26:56 +0000

小朋友成日都肚餓，仲記得我細個嘅時候都係成日肚餓，就同媽咪講要落去買嘢食。以前屋企樓下仲有車仔檔（走鬼嗰款）、一部車仔，分開咗幾格，賣魚肉生菜、碗仔翅、湯魚蛋、湯豆腐，超勁好味！

尋日阿女突然間話好耐冇食碗仔翅，於是係屋企附近熟食檔買，點之唔好食，好似食緊生粉水咁😞😞。

既然係咁就自己整啦！去雞檔買來新鮮嘅雞殼，然後再浸發日本花菇同埋有機木耳，夜麻麻準備咗個湯底今晚就煲啦！

用上新鮮雞殼做嘅雞湯，非常鮮味，自己整嘅碗仔翅仲可以落好多材料，茨汁用馬蹄粉，冇咗生粉水嗰種粉味，仲好晶凝通透添！

碗仔翅唔難做，大家快啲跟着食譜做吓啦！

材料：雞殼一個（我也買了幾隻雞髀起了骨，用埋啲骨一齊煲）、木耳一隻、日本花菇四至五隻（浸發後洗乾淨切絲）、粉絲一細個（浸發後剪成段）、雞蛋一隻、水800ml

調味料：蠔油一湯匙、生抽兩湯匙、老抽半湯匙、鹽適量、胡椒粉少許、麻油一茶匙、糖少許（吊味用）

茨汁：馬蹄粉一湯匙、水兩湯匙

步驟：
1. 雞殼及雞骨以跑活水的形式處理好
2. 把800毫升的水放在鍋中煮滾，加入雞殼及雞骨，大火煮滾，轉小火煮45分鐘至1小時，即成雞湯

3. 把雞殼及雞骨取走，把雞殼的肉撕下，撕成幼絲備用

4. 木耳絲及冬菇絲以少許糖及生抽醃10分鐘，以小鍋炒香

5. 把雞湯放進鍋中煮滾，加入炒香了的木耳絲及冬菇絲，再加入雞絲及粉絲

6. 加入調味料後自行試味至合適
7. 加入茨汁直至碗仔翅變杰後加入雞蛋成為蛋花即可

￼碗仔翅 彙整 - Daphne 樂思廚 Test