紅菜頭羅宋湯

Daphne 樂思廚 — Mon, 10 Jan 2022 14:04:39 +0000

原來大家都咁鍾意飲羅宋湯，個post出咗一個鐘頭已經有好多朋友話要食譜。好啦見呢排得閑啲快啲寫食譜俾大家先！

去茶餐廳食飯，通常套餐都會跟個湯：紅湯或者白湯。每一次我都係選擇飲羅宋湯嘅，不過喺茶餐廳飲嘅羅宋湯往往都只有茄汁嘅味道，欠缺蔬菜嘅鮮味，加上落咗味精，飲完之後好口渴！

其實自從中學開始，我間唔中都會喺屋企煲羅宋湯做下午茶，妹妹同埋我兩個人可以飲晒一煲羅宋湯！好癲！

講返今日個羅宋湯先，加入左新鮮牛展同埋紅菜頭嘅羅宋湯，配以有機嘅甘筍、西芹、蕃茄等等嘅蔬菜，用先炒香嘅方法處理蔬菜，將佢嘅鮮甜味釋放出來，未落鹽試味已經覺得好好味。

間唔中清清地煲個羅宋湯，食塊自家製嘅蒜蓉包，幸福就係咁簡單！

材料（6-8人份）
椰菜兩個、甘筍兩支、蕃茄四個、薯仔半個、紅菜頭一個、洋蔥一個、西芹三至四條、香葉三至四塊、蒜頭三至四粒、茄膏（細）一罐、水3L、牛展一個、指天椒2條（可省）

調味料：鹽少許、糖少許

步驟
1. 所有蔬菜（除了西芹）洗乾淨後切片、蒜頭拍扁備用、西芹切粒備用
2. 以跑活水的方法處理牛展後洗乾淨備用（不用切開）
3. 在電熱水壺煲滾3L的水保溫備用

4. 在大湯煲中加入少許油，先爆香蒜頭，按次序加入洋蔥，炒香後再加入甘筍、西芹粒、蕃茄、紅菜頭及薯仔，全部爆香

5. 加入茄膏，炒勻，放入牛展，加入椰菜，蓋上蓋子煮2-3分鐘

6. 加入3L熱水以大火滾開，再轉中火煲1小時，取出牛展切片

肉味好濃！

7. 加入拍扁了的指天椒，煮一會兒（煮得越來會越辣㗎！），完成後加入調味料即可。

羅宋湯 彙整 - Daphne 樂思廚 Test